الحلقه السادسه عشر

الحلقه السادسه عشر

سعديه بقى بعد اما روحت بيت عمها حست انها مخنوقه ومدايقه ومش عارفه تعمل اى حاجه خرجت لعمها واستاذنت منه انها تروح البلد عند اهلها تقعد 15 يوم تفك عن نفسها وتسلم على امها وابوها واخواتها اصلهم وحشوها وفعلا عمها وصلها لمحطه القطر وركبت سعديه وروحت بلدهم وبعد اما وصلت البيت وسلمت على ابوها ومامتها واخواتها واعدت بقى تحكيلهم على مصر وكمان على الى شافته فى الرحله وهمه مندهشين بقى وباباها
عمال يوصيها بقى
الحج سليمان ابو سعديه
الحج سليمان : بت يا سعديه تاخدى بالك من نفسك ومن شباب مصر دول علشان دول جولالات خشى ولا يخافوا ربنا اوعى حد يغويكى ويضحك عليكى
سعديه :يغوينى ايه يابا دول ولا يفرجوا حاجه عن البنات مستحيل ابص لحد فيهم متخافش يابا معاك راجل
الحج سليمان :عارف يا بتى وعلشان كده امنت عليكى وسبتك تسافرى تتعلمى وحدك
وفى اثناء الحوار دخل ابن عمها الى بيحب سعديه وعايز يتجوزها اسمه محمدين
محمدين : السلام عليكم ازيكم يا جماعه
سعديه : فى سرها ( يا جاعدين يكفيكوا شر الجايين ابو الفصاد جه يادى اليوم لاسود ) اهلا يا محمدين
محمدين :ازيك يا سعديه يا بنت عمى نورتى البلد كيف احوالك
سعديه : الحمد لله يا محمدين كويسه
محمدين :ايه يا بنت عمى امتى امتحاناتك علشان نعمل فرحنا
سعديه : فرح مين انت يا ابو فرح اصوم اصوم وافطر على بصله ادى الى ناجص اخدك انت
محمدين :ليه يا سعديه هو انا بصله
سعديه : ايوه وبصله مصننه كمان ووبشراشير طويله وهبله ومعفنه وريحتها وحشه كمان
محمدين : عيب كده يا سعديه تشكرى يا بت عمى بس اعملى حسابك مش هتاخدى غيرى انا
الحج سليمان ابو سعديه اعد مش عاجبه الوضع
الحج سليمان : انتى يا بت مش هتاخدى غير ابن عمك اخرسى مش هتاخدى غير محمدين
سعديه : ومالك يابا فرحان جوى كده وانت بتجول محمدين على اساس ان الدوبل مش محمد واحد اتنين فى بعض ولا على اساس انه رئيس الوزراء
الحج سليمان : انا جولتها كلمه وهشوف كلام مين الى هيمشى
وسابها وخرج هو ومحمدين واعدت هى ومامتها الست عطيات
الست عطيات :ايه يا سعديه التعليم خلاكى تعلى علينا يا بتى
سعديه :تعليم ايه ونيله ايه يا امه ده مش بيعرف الالف من كوز الدوره ولا حتى بيعرف يكتب اسمه
الست عطيات :ده ابن عمك وعارك يا بتى
سعديه : على اساس ان انا الراجل وهو الست عارى وهعلمه ايه بس ياما علشان انا مش ناجصه وكرهت البلد من بوزه الفجرى ده الى شبه الشبشب المجلوب ولو كلمه تانى هسيب البلد وهمشى انهرده مش هبات فيها
الست عطيات :خلاص يا بتى انا سكت اهو بس انتى لازم تراجعى نفسك ربنا يهديكى
سعديه بقى اعدت هتموت ومش طايقه اى حد وبدأت تفكر
( محمدين مين ده الى هتجوزه انا كنت بقول محمد لا طلعلى محمدين واهو كمان محمد خطب البت ام سحلول الى اسمها جنى ربنا ياخدها وجنى يركبها ولا يعرفوا يطلعوه منها بس انا مش ممكن اوافج على ابو الفصاد ده ولا يمكن اتجوزه ادى الى ناجص اخد واحد جاهل وكمان فجرى وشه يجطع الخميره من البيت انا هجدى ايامى دى على خير وعلى ما تاجى الاجازه اكون لجيت حل والاجازة خلصت وراحت مصر تانى
ياترى ايه اللى هيحصل ف الحلقة الجايه؟انتظروا يوم الثلاثاء باذن الله..........

هههههههههههه جامدة بس ايو الحج سليمان دة
شباب مصر دول علشان دول جولالات خشى
مين قال كدا

ههههههههههههههه
بس انا شايفه ان مبقاش يفرق دول عن دول
اللى فى مصر دلوقتى بقى موجود فى الارياف بالظبط

اما انا عايزة اعرف امتى ظاهره البنت فى الارياف وخصوصا الصعيد
لازم تجوز ابن عمها لحد دلوقتى موجوده ومش عارفه
امتى الظاهره دى هتنتهى ولا شايفين انها مش هتتغير ابدا

بس ما علينا اما نشوف هتعمل ايه سعديه بعد كده
ربنا يقويها ههههههههه