شفت الكلب ميشو ؟؟

شفت الكلب ميشو ؟؟

ميشو اتولد , و كبر , و اعتمد على نفسه , و اتجوز و خلف كلاب صغيرين و في الآخر ........ مات !!
.
.
.
.
.
.
.
.
.

للأسف كتييييييييييييييير مننا بيعيش زي ميشو كده ,
لكن للأسف مش بيموت زيه ,

ميشو و أمثاله من الحيوانات بعد ربنا ما يقتص منهم لبعض - حتى يقتص من الشاة القرناء للشاة الجلحاء - هيبقوا تراب

إنما احنا لالالالالالالالالالالالالالالا لالا

احنا هنموت و نتحاسب في القبر و نتحاسب يوم القيامة
و في الآخر يا ندخل الجنة
يا إما ندخل النار

يبقى لازم نحسبها صح و نشوف احنا عايشين بنعمل إيه ,

طبعا عارف انك بتقول في سرك : عارفين انت عاوز تقول إيه يا عم الشيخ شفت الكلب ميشو ؟؟ Dry

, اننا مخلوقين للعبادة , صح ؟؟

هقول لك : لا يا عم الفهمان , أنا مش هقول كده ,

احنا مخلوقين للعبادة آه , دي حاجة عامة ,
إنما احنا عبادتنا إيه ؟؟
و الطريق اللي هنمشي فيها و توصلنا في الآخر للعبادة إيه ؟؟

مش فاهم , صح ؟؟

أبسطها لك ,

بص يا سيدي ,

مش ربنا خلقنا لعبادته ؟؟
يبقى نقعد نعبده و خلاص ما نشتغلش و لا نعمل حاجة غير العبادة ,
صح ؟؟

لا مش صح , ربنا خلقنا علشان العبادة و تعمير الأرض ,

طيب إزاي نجمع ما بين الاتنين دول ؟؟

بسيطة ,
بص يا سيدي ,

فيه طريقين بيوصلوك للجنة :

الطريق الأول : طريق عبادة محض , و الناس كلها بتشترك فيه,
زي الصلاة و الصوم و الزكاة , و كل العبادات اللي كل الناس تقدر تعملها ,

و الطريق التاني : هو الطريق الخاص بتاعك ,
و اللي مكانك و ظروفك في الدنيا تؤهلك للمشي فيه ,

أفهمها لك أكثر بحديث لرسول الله - صلى الله عليه و سلم -
قال رسول الله :
" من أنفق زوجين في سبيل الله نودي من أبواب الجنة :
يا عبد الله هذا خيرٌ ؛
فمن كان من أهل الصلاة دُعي من باب الصلاة ،
ومن كان من أهل الجهاد دُعي من باب الجهاد ،
ومن كان من أهل الصيام دعي من باب الريان ،
ومن كان من أهل الصدقة دعي من باب الصدقة "
. فقال أبو بكر : بأبي أنت وأمي يا رسول الله ! ما على من دُعي من تلك الأبواب من ضرورة ؛ فهل يدعى أحدٌ من تلك الأبواب كلها ؟!
قال : " نعم ! وأرجو أن تكون منهم " .

فأكيد مثلا اللي هيُدعى من باب الجهاد مش هيكون مش بيصلي أو مش بيتصدق ,
لا , هيكون بيصلي و بيتصدق و كل الحاجات التانية - الطريق الأول المشترك بين الجميع -
لكن متميز في طريق الجهاد - الطريق التاني بتاعه - .

لو مهندس مثلا و بتقبض فلوس كتير , يبقى تخلي الصدقة و التبرعات هي الطريق التاني اللي انت ماشي فيه ,
- مع وجود الصدقة في الطريق الأول اللي مشترك فيه مع غيرك -

و لو دكتور تخلي مساعدتك للمرضى هي الطريق التاني اللي انت ماشي فيه ,

لو مدرس تخلي نصيحتك للطلبة و توعيتهم بالدين وسط الكلام و الشرح هو الطريق التاني بتاعك ,

لو حافظ قرآن و بتصلي بالناس ممكن الطريق التاني بتاعك يبقى طريق الصلاة - مع وجودها في الطريق الأول برضه -

أتمنى إن العملية تكون مفهومة ,

و عاوزك و انت ماشي أو قاعد تقعد تفكر مع نفسك ,
إيه الطريق التاني اللي انت تقدر تمشي فيه ؟؟
و اللي هيجتمع فيه مصلحة دنياك و مصلحة آخرتك

انا الموضوع ده عجبنى اوى عشان حاجه واحده الطريق التانى
كتير مننا مش عارفين ايه هو الطريق التانى والمفروض يعمل
فيه لان كل واحد فينا مختلف عن التانى
وفى الاخر بيخسر كتير لانه عايش حياه ومش عارف يستفيد بيه ازاى فى الدنيا وكمان الاخره ,

ياااااااااااااااااااااااة مش عارف اقولك اية يا سارة دى حاجة روعة

بجد رائع يا ساره ومشوق تسلم ايدك

ميرسى ليك يا ذكى وميرسى يا نانا على مروركم ربنا يخليكم