سايبك يا دنيا

أنا ماشي وسايبك يا دنيا
وراحل ومش راجع

هعيش في دنيا تانيه

والكل عنها سامع

وداع يا أهلي وداع ياصحابي

كان نفسي أفضل وأبقى معاكوا

مانا خلاص ضيعت شبابي

ومش محتاج غير دعاكوا

مش عايز حزن ولا بكي

دوري انهارده ودوركم بكره

هبقى أنا وانتم قصه تتحكى

وهنبقى مجرد حتة ذكرى

الدنيا كده وكلنا عارفينها

قاسيه علينا ودايما بايعة

عايشين كلنا أيامها وسنينها

بننده عليها ولا هي سامعه

ده الواحد جاي الدنيا زيارة

وهيسيبها تاني والكل عارف

تلاقي الناس يفرحوله بحرارة

قدامهم الحقيقة ومحدش شايف

دي الدنيا بجد غريبة

ومحدش بيها بيحس

أحوالها كلها غريبة

والزمن ماشي عكس

المولود نازل يبكي ساعة

ما أهلوا كانوا فرحانين

والميت على طول ساكت

وأهلوا بيبكوا عليه سنين

ليكي يا دنيا مليون سلام

أنا رايح بيتي التاني

يلا كلها شويه أيام

واروح للي خلقني وسواني

سايبك يا دنيا

سايب الدنيا ورايح فين يا زكى ارحمنا من الاكتئاب شويه

فى منتهى الروعه يا ذكى فعلا هى دى الدنيا كلنا مسيرنا فى يوم هنسبها

ومش هناخد منها حاجه غير العمل الصالح

ايه يازكي سايبنا بس ورايح فين امال مين اللي هيرخم علينا ومين هيكتب لنا شعر ويكئبينا بيه
والله فعلا عندك حق
دي الدنيا بجد غريبة
وكل واحد بيجي بيبقي له دور ويمشي وبعد كده بيبقي مجرد ذكري او حتي ممكن ما يبقاش ذكري ويتنسي
هنعمل ايه بقي هي دي الدنيا

بجد شكرا ليكوا ولردودكم ولتشجعيكم ليا وربنا يخليكوا يارب

» فى دنيا
» خايف يا دنيا
» دنيا تانية
» يااحلي دنيا.
» دنيا ليها العجب...وما نعرفش ايه السبب